काठमाडौँ । सङ्घीय संसद्, प्रतिनिधिसभाले भोलि माघ २६ गते दिउँसो १ बजे बस्ने प्रतिनिधिसभाको बैठकको सम्भावित कार्यक्रमको कार्यसूची सार्वजनिक गरेको छ । कार्यसूचीअनुसार भोलिको बैठकमा अमेरिकी सहयाता परियोजना एमसीसीलाई राखिएको छैन ।
सत्तारुढ गठबन्धनभित्र एमसीसी सम्झौतालाई लिएर तीव्र विवाद देखिएको छ । नेपाली कांग्रेस एमसीसीलाई संसद्बाट अनुमोदन गराउन चाहन्छ । तर नेकपा माओवादी केन्द्र र नेकपा (एकीकृत समाजवादी) ले एमसीसीलाई यथास्थितिमा अनुमोदन गर्न नसकिनै बताउँदै आएका छन् । कार्यक्रमअनुसार प्रधानमन्त्री शेरबहादुर देउवाले ‘थारु आयोगको तेस्रो वार्षिक प्रतिवेदन आव २०७७/०७८’ पेश गर्नुहुनेछ ।
त्यसैगरी सभामुख अग्निप्रसाद सापकोटाले संविधानसभा सदस्य जगतबहादुर ताजपुरियाको निधनप्रति शोक प्रस्ताव प्रस्तुत गर्नुहुनेछ । विसं २०६४ को संविधानसभामा समानुपातिक तर्फबाट निर्वाचित ताजपुरियाको ७८ वर्षको उमेरमा गत पुस १७ गते निधन भएको थियो । भोलि ११ बजे कार्य व्यवस्था समितिको बैठक बस्नेछ ।
