एजेन्सी । बलिउड अभिनेता सन्नी देओल र अमिषा पटेलको फिल्म ‘गदर २’ रिलिज भएको तीन हप्ताभन्दा बढी समय बितिसक्दा पनि टिकट काउन्टरहरूमा राम्रो संख्यामा ग्राहक पाईरहेको छ ।
‘गदर २’ ले बक्सअफिसमा भारु ५०० करोड कमाईसकेको छ । सोमबार मात्रै फिल्मले २.५ करोड कमाएको बताईएको छ । प्रारम्भिक अनुमान अनुसार फिल्मले अहिले ५०३.६७ करोड रुपैयाँ कमाएको छ ।
‘गदर २’ अगस्ट ११ मा रिलिज भएको थियो । अक्षय कुमारको ‘ओएमजी २’ र रजनीकान्तको ‘जेलर’को एक दिनपछि रिलिज गरेको फिल्मले पहिलो दिनमा ४० करोड कमाएको थियो । भारतको स्वतन्त्रता दिवसको दिनमा मात्रै यसले ५५ करोड कमाएको थियो । जसको सहयोगमा यसले आफ्नो पहिलो हप्तामा २८४.६३ करोड भारु सङ्कलन गर्यो ।
यसले दोस्रो हप्तामा १३४.४७ करोड र तेस्रो हप्तामा ६३.३५ करोड थप्यो। यससँगै ‘गदर २’ ले रिलिजको २४ औं दिनमा ५०० करोड कटाएको हो ।
‘गदर २’ को सफलताको उपलक्ष्यमा शनिबार भव्य पार्टीको आयोजना गरिएको थियो। पार्टीमा निर्देशक अनिल शर्मासहित फिल्मका सम्पूर्ण कलाकारहरुको उपस्थिति रहेको थियो । अमिषा पटेल आफ्नो ग्लैमरस अवतारमा सिक्वेन्ड गाउनमा थिइन् भने सन्नी नीलो सूटमा थिए। पार्टीमा धर्मेन्द्र, छोरा र बुहारी दृष्टि आचार्य र बबी देओलसहित उनको सम्पूर्ण देओल परिवारको समेत सहभागि भएका थिए ।
