काठमाडौँ । नेपाली कथानक फिल्म ‘एक भगवत् गीता’को ट्रेलर सार्वजनिक भएको छ । ट्रेलरमा अभिनेता विपिन कार्की कमलामाइको अवरतारमा छन् । उनको यो अहिलेसम्मकै फरक अवतार हो ।
जनकपुरको परिवेशमा खिचिएको फिल्मको सुरुवाती नाम ‘भागवत गीता’ थियो । हिन्दुवादी संगठनले विरोध जनाएपछि फिल्मको नाम परिवर्तन गरी ‘एक भगवत् गीता’ बनाइएको हो ।
झरना थापाको निर्देशन रहेको फिल्ममा विपिनसँगै सुहाना थापा र धिरज मगरको मुख्य अभिनय छ । त्यसैगरी कबीर खड्का, जेविस र जेविन श्रेष्ठ, संजोग रसाइली, मुकेश झा, अनुराग कुँवर, राम कैलाश ठाकुर, धिरज ठाकुरलगायतको पनि अभिनय छ ।
सुनिलकुमार थापाको निर्माण रहेको फिल्मको कथा झरनाको हो भने पटकथा लेखनमा उनले सरिन पोखरेल, परिच्छेद सेन, पुरुषोत्तम ढंगेल र कृष्णको सहायता लिएकी छिन् । फिल्ममा राजेश श्रेष्ठको छायांकन, मित्र डी गुरुङको सम्पादन, हिमाल केसीको द्वन्द्व, कविराज गहतराजको कोरियोग्राफी तथा शैलेश श्रेष्ठको ब्याकग्राउण्ड स्कोर छ ।
फिल्म भाद्र २९ गते प्रदर्शनमा आउनेछ ।
