काठमाडौंः एसिया कप क्रिकेट प्रतियोगिता अन्तर्गत समूह बी को पहिलो खेलमा श्रीलंकाले बंगलादेशलाई पाँच विकेटले पराजित गरेको छ ।
श्रीलंकाको पालिकेल रंगशालामा भएको यस खेलमा बंगलादेशले दिएको १६५ रनको झिनो लक्ष्य श्रीलंकाले ५ विकेट गुमाएर प्राप्त गरेको थियो ।
टस जितेर पहिले ब्याटिङ रोजेको बंगलादेश शुरुदेखि नै दबाबमा परेको थियो । बंगलादेशका लागि नजमुल सान्टोले सर्वाधिक ८९ रनको योगदान दिएका थिए भने तोहिद हृदोयले २०, मोहम्मद नइमले १६, मुस्फिकर रहिमले १३ रन बनाएका थिए । अन्य ब्याट्सम्यानले दोहोरो अंक बनाउन सकेका थिएनन् ।
बंगलादेशको पूरै पालि ४२.४ ओभरमा सबै विकेट गुमाएर १६४ रनमा समेटिएको थियो ।
श्रीलंकाका तर्फबाट मथिसा पाथिरानाले ४, महिस थिक्सानाले २, धनन्जय सिल्भा, डुनिथ विलालागे र डासुन सानाकाले एकएक विकेट लिएका थिए ।
बंगलादेशले प्रस्तुत गरेको १६५ रनको लक्ष्य श्रीलंकाले ३९ ओभरमा पाँच विकेट गुमाएर प्राप्त गरेको थियो । श्रीलंकाका लागि सदीरा सामराविक्रमाले ५४ र चरिथ असालान्काले ६२ रनको व्यक्तिगत पालि खेलेका थिए ।
एसिया कपमा समूह ए मा नेपाल, भारत र पाकिस्तान छन् भने समूह बी मा बंगलादेश, श्रीलंका र अफगानिस्तान छन् । हिजो भएको समूह ए को पहिलो खेलमा आयोजक पाकिस्तानले नेपाललाई २३८ रनले पराजित गरेको थियो ।
श्रीलंकाको प्लेइङ ११– पाथुम निसान्का, दिमुथ करुणारत्ने, कुसल मेन्डिस (विकेटकीपर), सदीरा समरविक्रमा, चरित असालान्का, धनंजया डी सिल्भा, दासुन शानाका (कप्तान), दुनिथ वेललागे, महेश थेक्षाना, कसुन रजिथा, मथिशा पाथिराना।
बंगलादेशको प्लेइङ ११–मोहम्मद नइम, तान्जिद तमिम, नजमुल हुसेन शान्तो, तौहिद ह्रिदोय, शकिब अल हसन (कप्तान), मुशफिकुर रहिम ९विकेटकिपर०, मेहेदी हसन, महेदी हसन, तस्किन अहमद, शोरिफुल इस्लाम, मुस्ताफिजुर रहमान । एजेन्सी
