काठमाडौँ । नेपाल वायुसेवा निगमले इलामको फाल्गुनन्द सुकिलुम्बा विमानस्थलमा सफल परीक्षण उडान गरेको छ । निगमले आज एक प्रेस विज्ञप्ति जारी गरी निगमको ट्विन अट्टर (नाइन एन एबीटी) विमानद्वारा काठमाडौँ अन्तर्राष्ट्रिय विमानस्थलबाट बिहान ९ः०५ बजे उडी इलामको सुकिलुम्बा विमानस्थलमा बिहान १०ः०२ बजे अवतरण गरी सफल परीक्षण उडान सम्पन्न भएको जनाएको छ ।
उक्त परीक्षण उडानको प्रतिवेदन तयार भएपश्चात सुरक्षाका सम्पूर्ण सिफारिसहरु अवलम्बन गर्ने गरी निगमले नियमित उडान सञ्चालनको तयारीको प्रक्रिया अघि बढाउने विज्ञप्तिमा उल्लेख छ ।
सफल परीक्षण उडान सम्पन्न भएकामा निगमका कार्यकारी अध्यक्ष युवराज अधिकारीले व्यवस्थापनका तर्फबाट चालकदल तथा नेपाल नागरिक उड्डयन प्राधिकरणसहित सम्पूर्ण प्राविधिक टोलीलाई धन्यवाद ज्ञापन गर्नुभएको विज्ञप्तिमा जनाइएको छ ।
सो बिमानस्थलमा आउँदो फागुन ८ गतेदेखि व्यावसायिक उडानको तयारी छ । नियमित उडान हुनुअघि विमानस्थलमा आज मौसम अनुकूल भए नेपाल एयरलाइन्सले परीक्षण उडान भर्ने नेपाल नागरिक उड्डयन प्राधिकरणका इञ्जीनियर विनायक भट्टराईले जानकारी दिनुभयो । उहाँका अनुसार विमानस्थल कालोपत्र भएपछि परीक्षण उडान भएको छैन ।
विमानस्थल कालोपत्र गरिनु अघि २०७५ जेठ २१ गते परीक्षण उडान गरिएको थियो । काठमाडौँबाट १९ सिट क्षमताको तारा एयरको ट्वीनअटर जहाज एक घण्टा दुई मिनेटमा सुकिलुम्बा अवतरण गरेको थियो । ताप्लेजुङमा बिहान ७ बजे यात्रु लिएर आउने नेपाल एयरलाइन्सको जहाज सुकेटार विमानस्थलमा यात्रु ओरालेर इलाम आउने बताइएको छ ।
विमानस्थलको फागुन १ गते पूर्वप्रधानमन्त्री झलनाथ खनालले उद्घाटन गर्ने कार्यक्रम तय भएको छ । यसअघि फागुन ८ गतेदेखि व्यावसायिक उडानका लागि तारा एयर र इलाम नगरपालिकाबीच सम्झौता भइसकेको छ ।
