काठमाडौँ । नेपाली कांग्रेसका नेता डा शशांक कोइरालाले पूर्वगृहमन्त्री बालकृष्ण खाँणसँग भेट गर्नुभएको छ ।
नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वगृहमन्त्री बालकृष्ण खाँणलाई नेता कोइरालाले कारागारमै गएर भेट्नुभएको हो ।
खाँणलाई भेट्न बुधबार बिहान ९:१५ बजे कोइरला केन्द्रीय कारागार सुन्धारा पुग्नुभएको थियो । उहाँसँग थप दुई जना अन्य व्यक्ति पनि रहेको बताइएको छ । खाँण र कोइरालाबीच करिब १५ मिनेट कुराकानी भएको थियो ।
थुनामा रहेका खाँणलाई यसअघि कांग्रेस नेताहरु डा शेखर कोइराला, परराष्ट्रमन्त्री एनपी साउद लगायतका नेताहरुले पनि भेटिसक्नुभएको छ ।
नक्कली भुटानी शरणार्थी प्रकरणको अनुसन्धानका लागि खाँण वैशाख २७ गते पक्राउ पर्नुभएको हो । जिल्ला अदालत काठमाडौंको आदेशमा उहाँलाई १ असारमा पुर्पक्षका लागि कारागार पठाइएका थिए ।
