काठमाडौँ । नेकपा (एमाले)का अध्यक्ष केपी शर्मा ओली र नेकपा (एकीकृत समाजवादी)का अध्यक्ष माधवकुमार नेपालबीच संयोगले भेट जुरेको छ ।
अन्तर्राष्ट्रिय सम्बन्ध समितिको सभापति निर्वाचित गर्ने बैठकमा उनीहरु एकैसाथ बसेका हुन् ।
नेपाल सुरुमै बैठकमा पुगेका थिए भने ओली यादवलाई सभापति घोषित गरेपछि पुगेका थिए । उनीहरुबीच सामान्य औपचारिकता बाहेक अरु कुराकानी भएन । पूर्वप्रधानमन्त्रीहरूलाई अगाडि सिट प्लान गरिएसँगै ओली र नेपाललाई सँगै राखिएको थियो ।
एमाले विभाजन भई नेकपा एकीकृत समाजवादी गठन भएपछि ओली र नेपालबीच सम्बन्ध चिसिएको थियो । सार्वजनिक कार्यक्रममा एक–अर्काले आरोप प्रत्यारोप लगाउँदै आएका छन् ।
यसैबीच, अन्तराष्ट्रिय सम्बन्ध समितिको सभापतिमा जसपाका राजकिशोर यादव सभापति चयन भएका छन् । दलीय भागवण्डका आधारमा यादवको मात्रै उम्मेदवारी परेपछि सोमबार बसेको बैठकले उनलाई सर्वसहमत सभापति चयन गरेको हो ।
