काठमाडौँ । आम जनता पार्टीका अध्यक्ष प्रभु साहले नेपालमा लोकतन्त्र देखाउने दाँत मात्रै भएको टिप्पणी गरेका छन् । सोमबार पार्टीको केन्द्रीय कमिटी बैठकमा बोल्दै अध्यक्ष साहले छोटे राजाहरुले हालीमुहाली गर्दै शासनसत्ता चलाइरहेको आरोप लगाए ।
उनले नेपालमा लोकतन्त्र अझै नआईसकेको बताउदै भने, ‘प्रस्ट देख्न सकिन्छ कि नेपालमा दलका नेता र नेताका आशेपासेहरुको शासन छ । तिनीहरुको हालीमुहाली छ । आम जनता निरीह छन् ।’
उनले देखाउने दाँत लोकतन्त्र भएपनि चपाउने दाँत दलतन्त्र भएको टिप्पणी गरे । केही दल र त्यसका आसेपासेहरुले गरेको राज जनताले लाचार भएर हेर्नुपरेको उनको भनाई छ ।
दलीय सिन्डिकेट र दलीय निरंकुशतामा छोटे राजाहरुले रजगज गरिरहेको बताउदै उनले यस्तो खाले शासन प्रणालीबाट नेपालको भविष्य खोज्न नसकिने बताए ।
