काठमाडौँ । नेपाली राष्ट्रिय क्रिकेट टोलीका लेग स्पिनर सन्दीप लामिछाने एसिसी एसिया कप खेल्न आज (सोमबार) पाकिस्तान प्रस्थान गर्दैछन् ।
उनी कतार एयरवेजको फ्लाइटबाट पाकिस्तान जाने भएका हुन् । नेपाल क्रिकेट संघ (क्यान) का अनुसार उनी बिहान ११ः२० मा दोहा हुँदै मुल्तान पुग्ने कार्यतालिका छ ।
काठमाडौं जिल्ला अदालतले आइतबार सन्दीपको पेसी २१ भदौलाई सारेपछि उनी एसिया कप खेल्न पाकिस्तान जाने भएका हुन् । अदालतका न्यायाधीश प्रकाशप्रसाद पण्डितले सन्दीपको मुद्दा ‘हेर्न नभ्याउने’ सूचीमा राखेसँगै उनी पाकिस्तान जाने बाटो खुलेको थियो ।
नेपाली टोली यसअघि नै ५ भदौमा पाकिस्तान पुगेको थियो । कराँची पुगेको नेपाली खेलाडीले गत बिहीबारदेखि अभ्यास थालेका थिए । पहिलोपटक एसिया कपमा छनोट भएको नेपाल समूह ‘ए’मा रहेको छ ।
जसमा दुई महारथी पूर्व विश्व च्याम्पियन भारत र पाकिस्तानसमेत छन् । नेपालले १३ भदौमा पाकिस्तानसँग उद्घाटन खेल खेल्नेछ । यस्तै, १८ भदौमा भारतको सामना गर्नेछ ।
