विराटनगर । नेकपा एमालेका अध्यक्ष केपी शर्मा ओलीले पूर्वराष्ट्रपति विद्या भण्डारी एमालेमा सधैँ स्वागत रहेको बताएका छन् । कोशी प्रदेश कमिटीको पूर्ण बैठकलाई सम्बोधन गर्दै ओलीले पूर्वराष्ट्रपति भण्डारीलाई राजनीति गर्न कसैले नरोक्ने बताए ।
पार्टीमा काममा सक्रिय हुने चाहना देखाए कसैले निषेध नगर्ने ओलीको भनाई छ । ‘उहाँले राजनीति गर्छु भन्दा रोक्ने को हो ? कसले रोक्छ ? कसरी रोक्छ ? हामी उहाँलाई निषेध गर्दैनौं । उहाँ आएर राम्रो नेतृत्व गरे ठीक छ । उहाँ आउँछु त भन्नुपर्यो । उहाँलाई सधैँ वेलकम छ’, उनले भने ।
ओलीले एमाले नेताहरूले भेट्दैमा अनावश्यक हल्ला चलाउनु राम्रो नभएको बताए । उनले भने, ‘पूर्वराष्ट्रपति विद्या भण्डारीजी राष्ट्रपति भएर एउटा आदरणीय व्यक्ति हुनुहुन्छ । त्योभन्दा अगाडि उहाँ हाम्रो पार्टीको उपाध्यक्ष हो । हाम्रो पार्टीको आदरणीय व्यक्तित्व नै हो । त्यसैले हामीमध्ये कसैले भेट्नु, कुरा गर्नु भनेको ठूलो कुरा होइन।’
