काठमाडौँ । धरानमा रहेका राजनीतिक दलले शनिबार हुने कार्यक्रम स्थगन गर्न माग गरेका छन् । शुक्रबार विभिन्न राजनीतिक दलले सर्वदलीय विज्ञप्ति जारी गरेर धरानमा देखा परेको धार्मिक, सांस्कृतिक विवादका विषयहरूलाई सर्वपक्षीय सर्वदलीय वार्ताको माध्यमद्वारा समाधान गर्न प्रतिबद्ध रहेको जनाएका छन् ।
विगत केही दिनदेखि धरानमा देखिएको असहज परिस्थितिले सद्भाव, सहिष्णु वातावरण बिथोलिने आशंका उत्पन्न भएकाले चिन्तित बनाएको भन्दै सामाजिक सञ्जालबाट सामाजिक सद्भाव खलबलिने खालको पोष्टहरू प्रकाशन नगर्न समेत आग्रह गरिएको छ ।
विज्ञप्तिमा विज्ञप्तिमा नेपाली कांग्रेसका धरान सभापति श्याम पोखरेल, एमालेका हध्यक्ष कर्मजंग एभेङ, माओवादीका अध्यक्ष सुर्यबहादुर भट्टराई, नेकपा एसका अध्यक्ष रेवतीरमण राई, जसपा नेपालका अध्यक्ष ताजुब लिम्बु, रास्वपाका संयोजक राजेशमान श्रेष्ठ, राप्रपाका सचिव तिलक मगर, नागरिक उन्मुक्ति पार्टीका उपाध्यक्ष पदम खेवाहाङ, नेससपा इन्चार्ज दिनेश राई, सलोराम इन्चार्ज भुपेन्द्र सुन्दर लावती, राजमुपा नेपालका उपमहासचिव विष्णु थाम्देन, खिसपा अध्यक्ष भुपी कायी र विवेकशील साझा पार्टीका केन्द्रीय सदस्य सुदन कुमार श्रेष्ठले हस्ताक्षर गरेका छन् ।
सामाजिक सञ्जालबाट सामाजिक सद्भाव खलबलिने खालको पोष्टहरू प्रकाशन नगर्न विज्ञप्तिमा बताइएको छ । विज्ञप्तिमा भनिएको छ, ‘सामाजिक सञ्जालमा पोष्ट, शेयर तथा कमेन्ट नगरिदिन हार्दिक अनुरोध गर्दछौं । सम्बन्धित निकायलाई सामाजिक सद्भाव तथा शान्ति सुरक्षा कायम गर्न आवश्यक व्यवस्था गर्न अनुरोध गर्दछौं ।’
साथै, जाति, धर्म समुदायले एक आपसको धर्म, संस्कार, संस्कृति र परम्परालाई गरी सामाजिक द्वेष तथा आस्था भावनामा ठेस पुर्याउने गतिविधि नगर्न सर्वदलीय बैठकले अनुरोध गरेको छ ।
