एजेन्सी । जिम्बावेका दिग्गज क्रिकेटर हिथ स्ट्रीक जिवितै रहेका छन् । उनको मृत्युको खबर सबैभन्दा पहिले पूर्व टिममेट हेनरी ओलांगाले सामाजिक सञ्जालमा दिएका थिए । पछि उनले पोस्ट हटाए ।
समाचार एजेन्सी एएनआईका अनुसार मिड डे अखबारसँगको कुराकानीमा स्ट्रीकले भने – ‘सोसल मिडियाको जमानामा कसैको मृत्युको खबर बिना पुष्टि फैलाउन सकिन्छ भन्ने थाहा पाउँदा म निकै दुखी छु ।’
हेनरी ओलांगाले सामाजिक सञ्जाल पोस्टमा लेखेका थिए, ‘दुःखद खबर आएको छ कि हिथ स्ट्रीक अब अर्कै संसारमा गएका छन् । जिम्बावे क्रिकेटका महान क्रिकेटरको आत्माले शान्ति पाओस । तपाईंसँग खेल्न पाउनु सम्मानको कुरा हो ।’
एक घन्टापछि हेनरीले भने– ‘स्ट्रीक जिवित छन्, मैले उनीसँग कुरा गरेँ । उनको मृत्युको खबर निकै छिटो फैलियो । तेस्रो अम्पायरले उनलाई फिर्ता बोलाए । उनी जीवित छन् ।’
अलराउन्डर स्ट्रीकको अन्तर्राष्ट्रिय करियर १२ वर्षको थियो । उनले अक्टोबर २००५ मा अन्तर्राष्ट्रिय क्रिकेटबाट सन्यास लिएका थिए । स्ट्रीक सन् २००० देखि २००४ सम्म जिम्बावेका कप्तान थिए ।
स्ट्रीकले ६५ टेस्ट र १८९ एकदिवसीय क्रिकेट खेले । दुवै फर्म्याटमा ४९३३ रन बनाएका छन् भने ४५५ विकेट लिएका छन् । उनले टेस्टमा १९९० र एकदिवसीयमा २९४३ रन बनाएका छन् ।
स्ट्रीक अहिलेसम्म टेस्टमा १००० रन र १०० विकेट र एकदिवसीयमा २०० रन र २०० विकेट पूरा गर्ने एकमात्र जिम्बावे खेलाडी हुन् ।
स्ट्रीकले सन् १९९३ मा पाकिस्तानविरुद्ध कराँचीमा अन्तर्राष्ट्रिय डेब्यू गरेका थिए । रावलपिंडीमा भएको दोस्रो टेस्टमा ८ विकेट लिएका थिए । वेस्ट इन्डिजविरुद्ध हरारेमा खेलेको १२७ रनको इनिङ्स उनको टेस्ट करियरको एकमात्र शतक हो ।
सन्यास पछि, स्ट्रीकले बंगलादेशको प्रशिक्षकको रूपमा काम गरे । उनी २०१८ मा दुई पटकको इन्डियन प्रिमियर लिग (आईपीएल) च्याम्पियन कोलकाता नाइट राइडर्स (केकेआर) को बलिङ प्रशिक्षक पनि थिए ।
