एजेन्सी । फिल्म ‘ओह माइ गड २’ ले बक्स अफिसमा राम्रो कमाइ गरिरहेको छ । फिल्मले १० दिनसम्म आइपुग्दा ११३.६७ करोड भारू कमाएको छ । फिल्मले सकारात्मक प्रतिक्रिया पाइरहेको छ ।
यौन शिक्षामा आधारित यो फिल्म रिलिजअघि विवादमा परेको थियो । निर्माताहरू यो फिल्म सबै उमेर समूहका दर्शकले हेर्न पाउनू भन्ने चाहन्थे । तर सेन्सर बोर्डले फिल्मको २७ दृश्य परिमार्जन गर्दै एडल्ट सर्टिफिकेट दियो ।
यसैबीच, फिल्मका कलाकार आरूष वर्माले किशोरावस्थाको हुँदा आफूले फिल्म हेर्न नपाएको गुनासो गरेका छन् ।
‘मलाई आफ्नो पहिलो फिल्म हलमा हेर्न नपाउँदा दुःख लागिरहेको छ । मलाई थोरै नराम्रो लाग्यो र थोरै रिस पनि उठ्यो यदि सेन्सर बोर्डले कुनै निर्णय गर्छ भने त्यो सबैलाई फाइदा हुने खाल्को हुनुपर्छ । ओ माइ गड २ लक्षित उमेर समूहका दर्शकले हेर्न पाएनन् ।’ उनले भारतीय सञ्चारमाध्यममा भनेका छन् ।
अमित रायको लेखन तथा निर्देशनमा बनेको फिल्ममा अक्षय कुमार, पंकज त्रिपाठी र आरूष वर्मासँगै यामी गौतम मुख्य भूमिका छन् । यो फिल्म २०१२ को हिट ‘ओह माई गड’को सिक्वेल हो ।
