एजेन्सी । साउथका सुपरस्टार रजनीकान्त अहिले दुई कारणले चर्चामा छन् । एकातिर उनको फिल्म ‘जेलर’ले बक्स अफिसमा कीर्तिमानी कमाई गरिरहेको छ ।
उता, रजनी उत्तर प्रदेशका मुख्यमन्त्री योगी आदित्यनाथको खुट्टा छोएको कारण सामाजिक सञ्जालमा ट्रोल भइरहेका छन् ।
यसैबीच, रजनीकान्तले मिडिया अन्तरक्रियामा सीएम योगीको खुट्टा छुनुको कारण बताए । चेन्नई एयरपोर्टमा मिडियाले उनलाई प्रश्न गर्दा रजनीले भने, ‘उमेरमा मभन्दा कान्छो भए पनि यो मेरो बानी हो । जब कुनै भिक्षु वा योगी मेरो अगाडि आउँछन्, म उहाँहरूको पाउ छुन्छु ।’
हालै रजनीकान्त फिल्म जेलरको प्रचार गर्न उत्तर प्रदेशको राजधानी लखनउ पुगेका थिए । यहाँ उनले मुख्यमन्त्री योगी आदित्यनाथसँग भेट गरे । यस क्रममा रजनीकान्तले सीएम योगीको खुट्टा छोएका थिए जसका कारण उनी सामाजिक सञ्जालमा धेरै ट्रोल भएका थिए ।
रजनी अभिनित फिल्म ‘जेलर’को बक्स अफिस कलेक्शनले दिन प्रतिदिन रेकर्ड तोडिरहेको छ । फिल्मले सोमबार ६ करोड कमाएको छ । योसँगै यसको कुल कमाई २८७.७ करोड रुपैयाँ पुगेको छ ।
योसँगै यो फिल्मले विश्वभर ५ सय करोडको व्यापार गरेर ‘पोन्नियन सेल्वन’को रेकर्ड तोडेको छ । अब यसभन्दा अगाडि रजनीकान्तको आफ्नै फिल्म ‘२.०’ छ, जसले विश्वभर ७२३ करोडको कलेक्सन गरेको थियो ।
