विराटनगर । कोशी प्रदेशका मुख्यमन्त्री उद्धव थापाले सोमबार विश्वासको मत लिने समय सकिएको बताएका छन् । सर्वदलीय बैठकपछि सञ्चारकर्मीसँग कुरा गर्दै थापाले उपसभामुख सृजना दनुवारको अनुपस्थितीमा विश्वासको मत लिने सम्भावना नरहेको जनाए ।
‘आफैँले बोलाएको बैठक र उपसभामुखले दिएको समय थियो । उहाँ नै अनुपस्थित हुनुभयो’, थापाले भने, ‘उहाँले बोलाएको बैठकमा उहाँ नहुँदा के गर्ने भन्ने निर्णय कार्य व्यवस्था परामर्श समितिले निर्णय गर्छ । आजै विश्वासको मत लिने सम्भावना देखिएन । सल्लाह गरेर अर्को दिनलाई निश्चित गरेर हामी अगाडि बढ्छौँ ।’
आज विश्वासको मत लिने विषयमा कार्यव्यवस्था परामर्श समितिको बैठकले तय गर्ने थापाको भनाइ छ । उनले विश्वासको मत लिने विभिन्न तरिका र उपायहरु रहेको बताउँदै आफूले निर्धारित समयमै विश्वासको मत पाउने पनि दाबी गरे ।
उनले उपसभामुखले संसदीय परम्परा तोड्ने काम गरेको आरोप लगाउदै भने, ‘एमालेले सल्लाह एउटा गर्ने, कुरा एउटा गर्ने काम अर्को गर्ने भयो । विश्वासको मत लिने समयमा अनुपस्थिति हुने हो भने आफैँले किन समय दिएको ? समय नदिएको भए हुन्थ्यो नि ?’
