चितवन । आफ्नै लिङ्ग काटेर घाइते भएका युवकको भरतपुरमा उपचार जारी छ । मकवानपुरको मकवानपुरगढी गाउँपालिका– ७ नयाँगाउँका २२ वर्षीय युवकको चितवन मेडिकल कलेज भरतपुरमा उपचार भइरहेको हो ।
उनको लिङ्गको चुँडिन लागेको भागलाई फालेर शल्यक्रिया गरिएको कलेजका निर्देशक डा. दयाराम लम्सालले जानकारी दिए । उनी अहिले खतरामुक्त अवस्थामा छन् ।
६/७ घण्टा भन्दा पहिले काटिएको र काटिएको भाग जीवित नभएको त्यसलाई हटाइएको डा. लम्सालले बताए । उनको ४५ मिनेट जति लगाएर शल्यक्रिया गरिएको हो । काटिएको आधा भाग पनि बचाउनका लागि सर्जरी गरिएको डा. लम्सालले बताए ।
अस्पतालका सर्जन डा. किशोर ताम्राकार र डा. वीरेन्द्र राउतको टोलीले हुमागाईको शल्यक्रिया गरेको हो । अस्पतालका प्लास्टिक सर्जन डा. मनिष देवकोटा समेतको टोलीले काटिएको भाग बचाउने प्रयास गरे पनि सम्भव नभएको डा. लम्सालले बताए ।
बुधबार राति हेटौँडा बसपार्कस्थित लजमा बसेका उनी लिङ्ग काटेर घाइते भएका थिए । त्यसपछि उनी आफैं उपचारका लागि हेटौँडा अस्पताल पुगेका थिए । त्यसपछि उनलाई थप उपचारको लागि चितवन मेडिकल कलेज रेफर गरिएको थियो ।
