एजेन्सी । अगस्ट १५ मा फिल्मस्टार अक्षय कुमारले भारतीय नागरिकता पाएका छन् । अक्षय आफैंले ट्वीट गर्दै यसबारे जानकारी दिएका हुन् । उनले खुसी साट्दै लेखेका छन् – ‘अब मन र नागरिकता दुवै हिन्दुस्तानी । स्वतन्त्रता दिवसको शुभकामना… जय हिन्द ।’
अक्षय कुमारसँग अझै पनि क्यानडाको नागरिकता थियो । उनलाई क्यानेडियन कुमार भन्दै ट्रोल पनि गरिएको थियो ।
अक्षय कुमारले सन् २०११ मा क्यानडाको संघीय निर्वाचनपछि त्यहाँको कन्जरभेटिभ सरकारले क्यानडाको नागरिकता पाएका थिए । डिसेम्बर २०१९ मा, अक्षयले भारतीय राहदानीको लागि आवेदन दिए र उनले आफ्नो क्यानाडाको नागरिकता त्याग्न लागेको बताएका थिए ।
वास्तवमा, जब अक्षय कुमारका ब्याक–टू–ब्याक फिल्महरू भारतमा फ्लप भए, उनले साथीको सल्लाहमा क्यानडामा बस्ने निर्णय गरे । उनले राहदानीका लागि आवेदन दिए र त्यहाँको नागरिकता पाए । कफी विथ करणमा अक्षय कुमारले क्यानडाको नागरिकताका कारण धेरैले उनलाई क्यानडा कुमार भन्ने गरेको बताए । यद्यपि उनलाई यस्तो ट्रोलिङमा कुनै आपत्ति छैन ।
यता, अहिले हलमा रिलिज भइरहेको अक्षय कुमारको फिल्म ‘ओएमजी २’ ले राम्रो व्यापार गरिरहेको छ । फिल्मले रिलिजको चौथो दिन सोमबार १२ करोड कमाएको छ । योसँगै यो फिल्मको कुल कलेक्सन ५५ करोड पुगेको छ ।
