काठमाडौं। चालु आर्थिक वर्षको तेस्रो त्रैमासिकमा नेपाल टेलिकमको आम्दानी ७ प्रतिशतले वृद्धि भएको छ । चालु आर्थिक वर्षको तेस्रो त्रैमासिकमा टेलिकमले सेवाबाट मात्रै ९ अर्ब ७२ करोड ६४ लाख रुपैयाँ आम्दानी गरेको हो । टेलिकमका अनुसार यो दोस्रो त्रैमासिकको सेवाबापतको आम्दानीभन्दा ६३ करोड ६८ लाखले बढी हो ।
टेलिकमको दोस्रो त्रैमासिकको तुलनामा तेस्रो त्रैमासिकमा खुद नाफा पनि बढेको जनाइएको छ । चालु आर्थिक वर्षको दोस्रो त्रैमासिकमा खुद मुनाफा १ अर्ब ७७ करोड १६ लाख रहेकोमा तेस्रो त्रैमासिकमा खुद नाफा २ अर्ब ५९ करोड ५० लाख ७७ हजार पुगेको हो । दोस्रो त्रैमासिकको तुलनामा तेस्रो त्रैमासिकमा खुद मुनाफा ८२ करोड ३४ लाख ५२ हजार बढेको हो ।
टेलिकमले गत आर्थिक वर्षको तेस्रो त्रैमासिकसम्म गरेको कुल सेवाबापतको आयभन्दा यसपटकको सेवाबापतको आय करिब साढे दुई प्रतिशतले बढेको छ । गत वर्ष तेस्रो त्रैमासिकसम्म टेलिकमले सेवाबाट मात्रै २६ अर्ब ८३ करोड ६६ लाख आम्दानी गरेको थियो । यो आर्थिक वर्षको तेस्रो त्रैमासिकसम्म सेवातर्फबाट २७ अर्ब ४५ करोड १३ लाख आम्दानी गरेको टेलिकमले जनाएको छ ।
सेवातर्फको आय र मुनाफा बढे पनि कुल आम्दानीमा भने यो वर्ष कमी आएको टेलिकमले जनाएको छ । गत आर्थिक वर्षको तेस्रो त्रैमासिकसम्म टेलिकमले ३२ अर्ब २७ करोड २३ लाख आम्दानी गरेको थियो । तर यो आर्थिक वर्षको तेस्रो त्रैमासिकसम्म टेलिकमको कुल आय ३१ अर्ब ६७ करोड ३७ लाख मात्रै छ । खुद मुनाफामा पनि गत वर्षको सोही अवधिको तुलनामा घटेको छ ।
गत वर्ष तेस्रो त्रैमासिकसम्म टेलिकमले ७ अर्ब ५६ करोड ५५ लाख खुद मुनाफा गरेको थियो । तर यो वर्ष तेस्रो त्रैमासिकसम्म ५ अर्ब ८८ करोड ४४ लाख रुपैयाँ मात्रै खुद मुनाफा गरेको छ । बैंक तथा वित्तीय संस्थाको मुद्दती निक्षेप तथा कुल निक्षेपमा प्राप्त हुने ब्याजदर अघिल्लो वर्षको तुलनामा कम भएकाले ब्याज आम्दानीमा कमी आएकाले खुद मुनाफामा कमी आएको टेलिकमको भनाई छ ।
