काठमाडौँ । राष्ट्रिय स्वतन्त्र पार्टी (रास्वपा) की सांसद तोसिमा कार्कीले स्वास्थ्यमन्त्री मोहनबहादुर बस्नेतलाई सबै स्वास्थ्यकर्मीहरुको अभिभावकत्व महसुस गराउन सुझाव दिनुभएको छ ।
सामाजिक सञ्जाल फेसबुकमा सांसद कार्कीले हतोत्साहित भई देशका डाक्टर, नर्स, स्वास्थ्यकर्मी सबै विदेश पलायत हुन थालिसकेको भन्दै उनीहरुको अभिभावकत्व महसुस गराउन सुझाव दिनुभयो ।
स्वास्थ्यमन्त्री बस्नेतले आफ्नो कार्यकालको १०० दिन पूरा भएको उपलक्षमा आज सेतो कोट दिवस मनाउन सेतो एप्रोनसहित डाक्टरहरुलाई बोलाउनुभएको रहेछ भन्दै सांसद कार्कीले विगतमा बोलेका कुरालाई लिएर समीक्षा गर्दै माफी माग्न पनि आग्रह गर्नुभएको छ ।
उहाँले भन्नुभएको छ, “निरुत्साहित भई गुनासो पोख्न गएका स्वास्थ्यकर्मीलाई ‘आत्महत्या गर्ने भए डोरी मै दिन्छु, मन्त्रीकै गेटमा आई झुण्डिन भन्दिनु’ भनी अमानवीय, अमर्यादित अभिव्यक्तिसहित आत्महत्या दुरुत्साहन गर्नुभएकोमा आज ती तमाम डाक्टर र सम्पूर्ण स्वास्थ्यकर्मीहरु समक्ष आममाफी पनि माग्नुहोला ।”
