काठमाडौं । नेकपा एमालेका अध्यक्ष केपी शर्मा ओलीले राष्ट्रिय हितको लागि आफ्नो पार्टी सरकारसँग सहकार्य गर्न तयार रहेको बताएका छन् ।
नेपालको परराष्ट्र नीति सम्बन्धी अन्तक्रिया कार्यक्रमा बोल्दै अध्यक्ष ओलीले राष्ट्रिय हितमा जुनसुकै दलले ल्याएका कुराहरूमा पनि एमालेको समर्थन रहने बताएका हुन् ।
ओलीले सरकारले मनपरी गर्दै जाने र देशको अहित हुने निर्णय तथा सन्धि सम्झौता गर्ने विषयलाई भने आफूहरुको समर्थन नरहने बताए ।
सरकारले छिमेकी देशहरूसँग गर्ने सम्झौताका विषयमा सबैले थाहा पाउनुपर्ने भएपनि त्यो परम्परा नभएको उल्लेख गर्दै ओलीले प्रधानमन्त्री पुष्पकमल दाहाल प्रचण्डको भारत भ्रमणका समयमा राष्ट्रहित भन्दा पनि सत्ता स्वार्थका लागि सम्झौता भएको आरोप लगाए ।
उनले प्रधानमन्त्रीले इपीजी प्रतिवेदन, सीमाक्षेत्रका विषयमा कुरा उठाएर समाधानका लागि पहल गर्नुपर्नेमा त्यसो हुन नसकेको आरोप लगाए ।
