काठमाडौँ । नेकपा (माओवादी केन्द्र) ले आगामी भदौदेखि ३ महिनासम्म संगठन सुदृढीकरण अभियान चलाउने भएको छ ।
बुधबार सुरु पार्टीको केन्द्रीय समिति बैठकमा अध्यक्ष पुष्पकमल दाहाल प्रचण्डले सांगठनिक प्रतिवेदन प्रस्तुत गर्दै भदौ, असोज र कात्तिक महिनामा ‘जनतासँग पार्टी अभियान’ चलाउने जानकारी दिनुभयो ।
अध्यक्ष प्रचण्डको प्रतिवेदनमा अभियानका क्रममा देशभरका सबै ६ हजार ७४३ वटै वडा समिति गठन गर्ने, सबै जातीय मोर्चाले आफ्नो जनसंख्याको कम्तीमा १० प्रतिशतलाई संगठित गर्ने उल्लेख छ ।
यो अभियानमा सबै समिति डिजिटल बनाउने, वार्षिक कार्यतालिका बनाउने, मंसिरमा विधान सम्मेलन गर्ने, सचिवहरुले प्रदेशको जिम्मेवारी लिने र सबै केन्द्रीय सदस्य वडा तहमा पठाउने पनि योजना प्रस्तुत गरिएको छ ।
अध्यक्ष प्रचण्डका अनुसार यो समयमा विचार मिल्नेसँग एकता गर्ने, एकतामा संख्या भन्दा विचारमा जोड दिने, कार्यकर्ता सामूहिक कोष बनाउने योजना छ । उहाँले माओवादी केन्द्रले जितेका १२२ वटा स्थानीय तहलाई नमूना बनाउने पनि योजना रहेको जानकारी दिनुभयो ।
