विराटनगर । कोशी प्रदेशमा पहिलो चरणमा बन्ने मन्त्री र मन्त्रालयको भागबन्डाबारे सत्तागठबन्धनबीचमा सहमति भएको छ । सत्ता गठबन्धनमा मन्त्रालय बाँडफाँटबारे सहमति हुननसक्दा बुधबार बिहान साढे १० बजे रोकिएको शपथ ग्रहण कार्यक्रम बेलुका ५ बजे हुने तय भएको छ ।
सत्ता गठबन्धनको बैठकमा नेकपा (माओवादी केन्द्र) लाई आर्थिक मामिला तथा योजना मन्त्रालय र नेकपा (एकीकृत समाजवादी) लाई भौतिक पूर्वाधार मन्त्रालय दिने सहमति भएको हो ।
मुख्यमन्त्रीमा नेपाली कांग्रेसका उद्धव थापालाई बहुमत पुर्याउन सभामुखबाट राजीनामा दिएका बाबुराम गौतम आर्थिक मामिला तथा योजनामन्त्री हुनुनहुने भएको छ ।
माओवादी केन्द्र गौतमको नेतृत्वमा सरकारमा जाने सहमति भएको छ । सहमतिभए सँगै आजै शपथग्रहण कार्यक्रम हुने भएको छ ।
एकिकृत समाजवादीका कमल प्रसाद जवेगु भौतिक पूर्वाधार मन्त्री बन्नु हुनेछ । नेपाली कांग्रेसका प्रदीप सुनुवारलाई भने सामाजिक विकास मन्त्रालयको जिम्मा दिने तयारी भएको छ । थप मन्त्रीको नियुक्ति भने सरकारले विश्वासको मत लिएपछि मात्र गर्ने तयारी छ ।
प्रदेश प्रमुख पर्शुराम खापुङले संविधानको १६८ को उपधारा २ अनुसार कांग्रेस, माओवादी केन्द्र, नेकपा एस र जसपाको समर्थन पाएका थापालाई मंगलबार मुख्यमन्त्री नियुक्त गर्नुभएको थियो ।
