काठमाडौँ । नेपाली कांग्रेसले राष्ट्रव्यापी अभियानका लागि केन्द्रीय सदस्यहरूलाई जिल्ला–जिल्लामा खटाएको छ। यही साउन १० को केन्द्रीय समिति बैठकले पार्टीको सांगठानिक सुदृढीकरणका लागि केन्द्रीय सदस्यलाई जिल्ला तोकेर खटाउने निर्णय गरेको थियो ।
मुख्यसचिव कृष्णप्रसाद पौडेलले केन्द्रीय सदस्यहरूलाई जिल्ला खटाउन सुरू गरिएको जानकारी दिनुभयो । उहाँका अनुसार सुदूरपश्चिम, कर्णाली र कोशी प्रदेश भित्रका जिल्लामा खटिने केन्द्रीय सदस्यलाई पत्र दिने कार्य भइरहेको छ भने मंगलबार बेलुकीसम्म सबै जिल्लामा खटिने केन्द्रीय सदस्यलाई पत्र दिइसकिने छ।
कांग्रेसले ७७ जिल्लामै केन्द्रीय सदस्य खटाउने भएपछि केन्द्रीय कार्यालयबाट पत्र लिएर केन्द्रीय सदस्यहरू जिल्ला जान थालेका छन्। संगठन सुदृढीकरणका लागि साउन २० गतेदेखि ३० गतेसम्म आन्तरिक रूपमा जिल्ला–जिल्लामा केन्द्रीय सदस्यहरूले छलफल गर्नेछन्।
त्यसपछि भदौ १० देखि २४ गतेसम्म कांग्रेसले संगठन सुदृढीकरणका लागि समुदायमा कांग्रेसले राष्ट्रव्यापी अभियान सञ्चालन गर्ने तयारी गरेको छ।
