काठमाडौँ। सुदूरपश्चिम प्रदेश सरकार विस्तारबारे आज सत्ता गठबन्धनको शीर्ष नेताहरू बिच निर्णायक छलफल हुन लागेको छ । बिहान ९ बजेबाट बालुवाटारमा शीर्ष नेताहरू बिचको छलफलले प्रदेश सरकार बिस्तारमा टुङ्गो लगाउने अपेक्षा गरिएको छ ।
अहिले सुदूरपश्चिम सरकारमा दुईवटा मन्त्रालय मन्त्री विहीन छ । मन्त्री विहीन भूमि व्यवस्था कृषि तथा सहकारी मन्त्रालय र आन्तरिक मामिला तथा कानुन मन्त्रालयमा एकै दिन मन्त्री नियुक्त गर्ने मुख्यमन्त्री कमल बहादुर शाहको तयारी छ । तर, दलहरू बिच ठोस सहमति हुन नसक्दा सरकार विस्तार अड्किएको छ।
नागरिक उन्मुक्तिले २ मन्त्री र १ राज्य मन्त्रीको दाबी गरेको छ । भागबन्डामा कुरा नमिलेसम्म तत्काल सरकारमा सहभागी नहुने नाउपाकी अध्यक्ष रन्जिता श्रेष्ठ चौधरीले यसअघि नै बताईसकेकी छन् ।
हिजो भएको माओवादी अध्यक्ष समेत रहेका प्रधानमन्त्री पुष्पकमल दाहाल प्रचण्डसँगको भेटमाआज बिहान ९ बजे शीर्ष नेताहरू बिच छलफल गरेर निकास दिने सहमति भएको थियो।
