काठमाडौं: दक्षिण कोरियामा पानी जहाज कम्पनी क्षेत्र (सिप बिल्डिङ) मा कामदार आवश्यक रहेको भन्दै नेपालस्थित रोजगार अनुमति प्रणाली (इपिएस) ले भाषा परीक्षाको आवेदन माग गरेको छ ।
इपिएसले आज एक सूचना प्रकाशन गरी दक्षिण कोरियाको मानव स्रोत विकास सेवाले सञ्चालन गर्ने यस्तो परीक्षामा सामेल हुन चाहने नेपालीलाई अनलाइन आवेदन मार्फत फारम भर्न अनुरोध गरेको छ । इपिएसले भाषा परीक्षा र सीप परीक्षणको परीक्षा लिनेछ ।
इपिएसका अनुसार, यही साउन २० गते शनिबारदेखि २४ गते बुधबारसम्म आवेदनको मिति तोकिएको छ ।
इपिएसले परीक्षा शुल्क अमेरिक डलर २८ लाग्ने जनाएको छ ।
आवेदकको योग्यता
क. नेपाली नागरिक
ख. उमेर १८ बर्ष पूरा भई ३९ बर्ष ननाघेको ।
ग. फौजदारी अभियोगमा अदालतबाट सजाय नपाएको ।
घ. गणतन्त्र कोरियामा गई गैर कानुनी रुपमा बसोबास नगरेको ।
ङ. नेपालबाट अन्य मुलुकमा जान रोक नलगाईएको ।
च. कोरियामा ई–९ र ई–९–१ भिषामा पाँच वर्षभन्दा कम अवधि बसेको ।
छ. कलर ब्लाइन्डनेस, कलर विकनेस र डिस्क एवं फिंगर एम्पुटेसन नभएको ।
