काठमाडौं । नयाँ प्रजातीको कोरोना भाइरस सर्ने दर उच्च रहेको भन्दै स्वास्थ्य तथा जनसंख्या मन्त्रालयले सबैलाई थप सतर्क रहन आग्रह गरेको छ। यो श्वासप्रश्वासको क्रममा सर्ने भएकाले संक्रमित व्यक्तिले खोक्दा वा हाँच्छ्यु गर्दा निस्किएको छिटाको सम्पर्कमा आउँदा संक्रमण सर्ने सम्भावना अत्याधिक रहने मन्त्रालयका प्रवक्ता डा. जागेश्वर गौतमले बताउनुभयो।
प्रेस ब्रिफिङको क्रममा कुनै पनि व्यक्तिले खोक्दा वा हाँच्छ्यु गर्दा निस्किएको छिटा धेरै टाढासम्म नपुग्ने भएपनि बन्द कोठामा बस्दा कोरोना संक्रमण सर्ने सम्भावना धेरै हुने डा. गौतमले बताउनुभयो। ‘हावा ओहोर दोहोर गर्ने ठाउँ नभएको बन्द कोठामा बस्दा संक्रमितभन्दा टाढा रहँदा पनि संक्रमण सर्नसक्छ,’ उहाँले बताउनुभयो।
यस्तै खोप नलगाउने व्यक्तिको तुलनामा खोप लगाएका व्यक्तिमा यसले कम असर गरेको भन्दै सबैलाई आफूलाई पायक पर्ने केन्द्रमा गई खोप लिन समेत डा. गौतमले आग्रह गरेका छन्। साथै यसबाट बच्नको लागि तोकिएको जनस्वास्थ्यका मापदण्डहरुको पालना गर्न आवश्यक रहेको उहाँले बताउनुभयो।
