काठमाडौं । काठमाडौं महानगरपालिकाले राष्ट्रिय प्रजातन्त्र पार्टीको धुम्बाराही स्थित केन्द्रीय कार्यालय भवन सोमबारसम्म खाली गराउन निर्देशन दिएको छ ।
महानगरका कर्मचारीहरुले आज माइकिङ गरेर कार्यालय भवन खालि गर्न भनेका हुन् ।
राप्रपाका मुख्यसचिव केदारबहादुर अधिकारीले महानगरले भवन खालि गर्न मात्र भनेको तर के कारणले भवन खालि गर्नुपर्ने बारेमा नखुलाएको बताए ।‘उहाँहरुले माइकिङ गर्नुभएको थियो, तर लिखितरुपमा केही पनि दिनुभएको छैन । हामीले के कति कारणले खाली गर्नुपर्ने लिखित मागेका छौँ ।’, उनले भने,’ हाम्रै वरिपरी धेरै घरहरु हाइटेन्सनमुनि छन्, तर किन हो हाम्रोमा मात्रै माइकिङ गरेर जानुभयो ।’
अधिकारीले हाइटेन्सनमुनि थुप्रै घरहरु रहेकाले यहि कारणले राप्रपाको मात्रै भवन खाली गराउने कुरा उपयुक्त नरहेको बताए ।
