काठमाडौँ । कांग्रेसका महामन्त्री तथा सांसद गगन थापाले निर्वाचन आयोगलाई १५ हजार रुपैयाँ जरिवाना बुझाएका छन्।
बिहीबार आयोगलाई १५ हजार जरिवाना तिरेको उनले सामाजिक सञ्जालमार्फत् जानकारी दिएका हुन्।
गत मंसिर ४ गते सम्पन्न भएको प्रतिनिधिसभा र प्रदेशसभा निर्वाचनमा खर्च विवरण सार्वजनिक नगरेको भन्दै निर्वाचन आयोगले २४ सय बढी उम्मेदवारलाई जरिवाना तोकेको थियो।
थापाले खर्च विवरण सार्वजनिक गरेको जानकारी आयोगलाई गराउनुपर्ने बारे आफूलाई थाहा नभएको बताए । उनले भनेका छन्, ‘मैले निर्वाचन आयोगमा मिति २०७९र०८र२५ मा आफ्नो खर्च विवरण बुझाइसकेको छु। यो विवरण सार्वजनिक पनि भएको थियो। तर यस्तो जानकारी आयोगलाई गराउनु पर्ने जानकारी नभएको जानकारी गराउँछु । अत: १५ हजार जरिवाना तिरेको जानकारी गराउँदै, पहिला नै आयोगलाई बुझाएर सार्वजनिक भइसकेको निर्वाचन खर्च विवरण पुन: सार्वजनिक गरेको जानकारी गराउँछु।’
निर्वाचन आयोगले मंगलबार प्रेस विज्ञप्तिबारे सार्वजनिक गरेको खर्च विवरणबारे जानकारी नदिएको भन्दै प्रतिनिधि सभाका १०३७ र प्रदेश सभाका १२९८ जना उम्मेदवारहरूको सूची सार्वजनिक गरेको थियो।
