दाङ । गएरातिदेखिको लगातार वर्षाका कारण दाङको देउखुरी क्षेत्रका केही स्थान डुबानमा परेका छन् ।
भारी वर्षाका कारण दाङका देउखुरी, लमही नगरपालिका, गढवा र राजपुर गाउँपालिकाका विभिन्न ठाउँहरु डुबानमा परेका हुन् । जिल्ला आपतकालिन कार्य संचालन केन्द्रको अनुसार लमहीको सुनडबरी, राजपुर –५ भुर्कीहवा, कौडिया (कान्तिपुर गाउँ)का केही घर ठाउँ डुबानमा परेका छन् । डुबानमा परेकाहरुको उद्दारको लागि शसत्र टोलीहरु खटिएका छन् ।
त्यस्तै देउखुरीमा कौडिया खोला र सिंगे खोलामा बाढी आउँदा तल्लो तटीय क्षेत्रमा रहेका बस्ती डुबानको उच्च जोखिममा छन् । अझै पानी परिरहेकाले दिनभर सतर्क रहन अपिल गरिएको छ ।
दाङका बगासोती, लालमटिया, घोराही, शुक्रबारे, भालुबाङ, लमही, रातामाटा लगायतका स्थानमा भारी वर्षा मापन भएको जल तथा मौसम विज्ञान विभागले जनाएको छ । भारी वर्षा भएका कारण राप्ती र बबईलगायत अन्य नदीहरूको जलसतह बढ्न सक्ने भन्दै विभागले सतर्क रहन अपिल गरेको छ ।
