काठमाडौँ । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रले आगामी ३० वर्षपछि नेपालको अवस्थाबारे राजनीतिकर्मीहरुलाई एक दर्जन प्रश्न सोध्नुभएको छ ।
उहाँले देशको दीर्घकालीन हितका लागि राजनीति गर्ने हो भने राजनीतिकर्मीहरुले यी प्रश्नबारे मनन गर्नै पर्छ भन्दै ट्विट गर्नुभएको छ ।
हुन त काठमाडौँजस्तो धर्म, संस्कृति, सभ्यता र सौन्दर्य बोकेको उपत्यकामा ५ वर्षपछि ट्राफिकको अवस्था कस्तो होला भनेर नसोच्ने राजनीति भएको देशमा राजनीतिकर्मीलाई सोधिएको प्रश्नको कुनै अर्थ नलाग्ने उहाँको भनाइ छ ।
“तर पनि लाग्ने कुरा के हो भने, ३० वर्षपछिको नेपाल नसोच्ने हो भने बिग्रिएको देशलाई थप बिगार्न किन राजनीति गर्नु ? भन्नुहोला, चुनाव हार्नेले ठूला कुरा गर्ने ? तर यति बुझिदिनोस् कि अपवादलाई छोडेर चुनाव जित्नेले बिगारेको देश हो यो।”
उहाँले सोध्नुभएका एक दर्जन प्रश्न यस्ता छन्–
१. ३० वर्षपछि नेपाल कुन स्तरको विश्व भूराजनीतिक भूमरीमा पर्ला ?
२. ३० वर्षपछि नेपालभित्रको धार्मिकरजातीय माहोल कस्तो होला ?
३.३० वर्षपछि नेपालका प्रमुख संस्थाहरूको इमान र दक्षता कस्तो होला ?
४. ३० वर्षपछि नेपालको सार्वजनिक शिक्षा र स्वास्थ्यको स्तर कस्तो होला ?
५. ३० वर्षपछि नेपालको सामाजिक सुरक्षाको अवस्था कस्तो होला ?
६. ३० वर्षपछि नेपालको पूर्वाधार र आर्थिक विकासको स्तर कस्तो होला ?
७. ३० वर्षपछि शहरी विकास र भूउपयोगको रूप कस्तो होला ?
८. ३० वर्षपछि वैदेशिक रोजगारीमा जाने युवाको संख्या कति होला ?
९. ३० वर्षपछि दक्ष जनशक्ति पलायनको अवस्था कस्तो होला ?
१०. ३० वर्षपछि जलवायु परिवर्तनको नेपालमा कस्तो असर पर्ला ?
११. ३० वर्षपछि स्व–इच्छाले नेपालमा बस्न चाहनेको संख्या कति होला ?
१२. ३० वर्षपछिको नेपाल हरेक दृष्टिकोणबाट कस्तो देश होला ?
