काठमाडौँ । त्रिभुवन अन्तर्राष्ट्रिय विमानस्थलको अध्यागमन कार्यालयले जोर्डन जान लागेका १५ जनालाई फर्काएको छ ।
जोर्डन जान लागेका १३ महिला र २ पुरुषसहित १५ जना नेपाली कामदारलाई अध्यागमन कार्यालयले विमानस्थलबाटै फर्काएको हो ।
अध्यागमनले उनीहरूको साथबाट भिसा फेला नपारेकाले फिर्ता पठाउनु परेको विमानस्थलस्थित अध्यागमन कार्यालयका प्रमुख अध्यागमन अधिकृत रामबन्धु सुवेदीले जानकारी दिए ।
उनीहरु आइतबार बिहान बिनाभिसा जोर्डन जान लागेकाले उनीहरूलाई अध्यागमनले विमानस्थलबाट फर्काएको बताइएको छ । एयर अरेबियाको जहाजबाट उनीहरू बिहान साढे १० बजे जोर्डनतर्फ जान लागेका थिए ।
भिसा नभए पनि उनीहरुसँग श्रम स्वीकृति र जोर्डनको आन्तरिक मन्त्रालयले लेखेको पत्र पनि रहेको बुझिएको छ ।
