एजेन्सी । अल्लु अर्जुन अहिले फिल्म ‘पुष्पा २’ को सुटिङमा व्यस्त छन् । बलिउड अभिनेत्री उर्वशी रौतेला यस फिल्ममा आइटम नम्बर गर्दै देखिने चर्चा छ ।
एक रिपोर्टका अनुसार उर्वशीले यो ३ मिनेटको आईटम गीतका लागि २ देखि ३ करोड भारु शुल्क लिएकी छिन् । ‘पुष्पा २’ अर्को वर्ष रिलिज हुँदैछ । यसको बजेट करिब ३५० करोड रुपैयाँ रहेको बताइएको छ ।
द सियासत डेलीको रिपोर्ट अनुसार उर्वशीले यसअघि चिरञ्जीवी स्टारर तेलुगु फिल्म ‘वाल्टर वीरैया’ मा आइटम नम्बर गरेकी थिइन् । उनको फिल्मको ‘बोस पार्टी’ गीत निकै हिट भयो, त्यसपछि उर्वशीलाई ‘पुष्पा २’ को अफर आयो । उनको लोकप्रियता देखेर उर्वशीले निर्मातासँग २ देखि ३ करोड रुपैयाँ मागेकी छिन् ।
सन् २०२१ मा रिलिज भएको फिल्म ‘पुष्पाः पार्ट १’ मा सामन्थाले आइटम नम्बर गरेकी थिइन् । रिपोर्टका अनुसार यो ३ मिनेटको गीतको लागि सामन्थाले ५ करोड भारु लिएकी थिइन् । उनको गीत ‘उ अन्वा..’ निकै चर्चामा रह्यो । अब उर्वशीले दोस्रो भागमा कतिको जादू देखाउछिन् त्यो भने हेर्न फिल्म नै कुर्नुपर्ला ।
