विराटनगर । नेकपा (एकीकृत समाजवादी) का नेता राजेन्द्र राईले कोशी प्रदेशको मुख्यमन्त्रीमा आफ्नो दाबी नभएको बताउनुभएको छ ।
शुक्रबार कोशीका मुख्यमन्त्री हिक्मतकुमार कार्कीले विश्वासको मत पाउन नसकेपछि अब बन्ने नयाँ सरकारको मुख्यमन्त्रीमा आफ्नो दाबी नरहेको नेता राईले बताउनुभएको हो ।
मुख्यमन्त्री कार्कीले विश्वासको मत माग्दा शुक्रबार भएको मतदानमा प्रस्तावको पक्षमा जम्मा ४६ मत खसेको थियो । बहुमतका लागि ४७ चाहिन्थ्यो ।
९३ सदस्यीय प्रदेशसभामा चार सिट भएको एकीकृत समाजवादीका संसदीय दलका नेता राईले मुख्यमन्त्रीमा आफ्नो दाबी नरहेको स्पष्ट गर्नुभएको हो ।
उहाँले केन्द्रमा समझदारी भएको अवस्थामा जुनसुकै जिम्मा लिन तयार रहेको तर व्यक्तिगतरुपमा मुख्यमन्त्रीमा आफ्नो दाबी र प्रयास नरहेको बताउनुभयो ।
अब प्रदेश प्रमुखले नयाँ सरकार गठनका लागि आह्वान गर्नुहुनेछ । नयाँ सरकारका लागि प्रदेशप्रमुखको आह्वानसँगै बहुमतसहित मुख्यमन्त्रीमा दाबी गर्ने पाँचदलीय गठबन्धनका नेताहरुले बताएका छन् ।
