काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले इतिहास पढ्ने मात्र नभई रच्ने विषय पनि भएको बताउनुभएको छ ।
पार्टी स्थापना दिवसका दिन आज उहाँले सामाजिक सञ्जाल फेसबुकमा स्थापनाको छोटो समयमै पार्टीले इतिहास रचेको संकेत गर्दै भन्नुभएको छ, “‘होइन, छैन, सकिँदैन’ मात्र होइन ‘हो, छ र सकिन्छ’ भन्दै अघि बढ्नुपर्छ ।”
उहाँले पार्टी गठन भएको आलोचनातर्फ इंगित गर्दै भन्नुभएको छ, “आलोचना त कालिकोटमा अस्पताल बनाउँदा पनि हुन्थ्यो, कोभिडमा अक्सिजन खोज्दा पनि हुन्थ्यो। अल्मलिने हजार बहाना हुँदा, अघि बढ्ने लाख बाटो भेटिन्छन्। के छान्ने आफनो हातमा हुन्छ।”
सभापति लामिछानेले रास्वपा एक वर्षको हुँदा हिजोको जग खडा गर्ने सिधाकुरा टिमका साथी, News 24 र Galaxy टेलिभिजनलाई सम्झनु भएको छ । साथै ‘अघि बढी रहु, म साथमा छु’ भनेर घरबाटै हिम्मत दिने अर्धाङ्गीनी निकिता पौडेल लामिछाने लाई सम्झनु भएको छ ।
पार्टीप्रति ऐक्यबद्धता जनाउन आग्रह गर्दै भन्नुभएको छ, “आज ७ गते, साँझ ७ बजे, ७ प्रदेश, ७७ जिल्लामा ७७ पटक, एक्यबद्धताका लागि घण्टी बजाऔँ ।”
