एजेन्सी । अन्तर्राष्ट्रिय मैत्रीपूर्ण खेलमा ब्राजिलले सानदार जित निकालेको छ । ब्राजिलले अफ्रिकी राष्ट्र गिनियामाथि ४–१ को सहज जित दर्ता गरेको हो ।
ब्राजिललाई फराकिलो जित दिलाउन जोएलिन्टन, रोड्रिगो, एडर मिलिसाओ र भिनिसियस जुनियर(पेनाल्टी)ले एक–एक गोल गरे । सेरहोउ गुइरासेले गिनियाका लागि एक गोल फर्काए ।
आरसीडिइ स्टेडियम स्पेनमा भएको खेलको २७औं मिनेटमा जोएलिन्टनले गोल गर्दै ब्राजिललाई सुरुवाती अग्रता दिलाए । उनको यो डेब्यु गोल समेत हो । ३०औं मिनेटमा रोड्रिगोले गोल गर्दै ब्राजिलको अग्रता दोब्बर पारे ।
३६औं मिनेटमा गुइरासेले गोल गर्दै खेललाई पहिलो हाफमा २–१ को स्थितिमा ल्याए । ४७औं मिनेटमा मिलिसाओले गोल गर्दै ब्राजिललाई सहज जिततर्फ अघि बढाए ।
यस्तै, ८८औं मिनेटमा भिनिसियसले पेनाल्टीमा गोल गर्दै ब्राजिललाई ४–१ को सानदार जित दिलाए ।
