काठमाडौँ । नेकपा (एमाले) का महासचिव शंकर पोखरेलले राजनीतिक अस्थिरता रोक्न एमालेले मधेस सरकारलाई समर्थन गरेको बताउनुभएको छ ।
मधेस प्रदेशका मुख्यमन्त्री सरोजकुमार यादवले विश्वासको मत लिएको भोलिपल्ट अर्थात बुधबार महासचिव पोखरेलले यस्तो प्रतिक्रिया दिनुभएको हो ।
सामाजिक सञ्जालमा स्टाटस लेख्दै उहाँले राजनीतिक अस्थिरताका विरुद्धमा एमालेले मधेस प्रदेश सरकारलाई विश्वासको मत दिएको उल्लेख गर्नुभएको छ । साथै उहाँले बाँकी प्रदेशलाई पनि अस्थिरतातर्फ जानबाट रोक्न अन्य दलहरुले पनि यस्तै रचनात्मक भूमिका खेल्ने अपेक्षा राखेको उल्लेख गर्नुभएको छ ।
यस्तै उहाँले यतिबेलाको मुलुकको विकास र समृद्धिका लागि राजनीतिमा अस्थिरता र अराजकता गम्भीर चुनौती बन्न पुगेको बताउनुभएको छ ।
