काठमाडौं ।आइसिसी विश्व टेस्ट च्याम्पियनसिप २०२३ को फाइनलमा भारतमाथि सानदार जित निकाल्दै अष्ट्रेलियाले उपाधि हात पारेको छ । घरेलु मैदानमा आयोजित फाइनल खेलमा भारतलाई २ सय ९ रनको फराकिलो अन्तरले हराउँदै अष्ट्रेलियाले उपाधि जितेको हो ।
अष्ट्रेलियाले जितको लागि दिएको ४ सय ४४ रनको विशाल लक्ष्य पछ्याएको भारत अन्तिम दिन पहिलो सेसनमै २ सय ३४ रनमा अल आउट भयो । भारतका लागि विराट कोहलीले ७८ बलमा ७ चौकासहित सर्वाधिक ४९ रनमा आउट भए । स्कट बोल्यान्डले एउटै ओभरमा बिराट कोहली र रविन्द्र जडेजालाई आउट गरेपछि भारतको आशा लगभग समाप्त भएको थियो ।
यस्तै, अजिंक्या रहाणे १ सय ८ बलमा ४६ रन बनाएर आउट भए । भारतकाओपनर शुभमन गिल र कप्तान रोहित शर्माले ७।१ ओभरमा ४१ रनको साझेदारी गर्दै राम्रो सुरुवात दिलाएका थिए । गिल १९ बलमा २ चौका प्रहार गर्दै स्कट बोलान्डको बलमा स्लिपमा क्यामरन ग्रीनबाट क्याच आउट हुँदै पेभेलिएन फर्के । आक्रामक ब्याटिङ गरेका कप्तान शर्मा ६० बलमा ७ चौका र १ छक्कासहित ४३ रनमा आउट भए ।
अष्ट्रेलियाका लागि नाथन लायनले ४ विकेट तथा स्कट बोल्यान्डले ३ विकेट लिएका थिए । मिचेल स्टार्कले २ र कप्तान प्याट कुमिन्सको खातामा एक विकेट गयो ।
पहिलो इनिङमा नै अष्ट्रेलियाले जितको आधारशीला बनाएको थियो । स्टिभन स्मिथ र ट्राभिस हेडबीच २८५ रनको विशाल साझेदारीको मद्दतमा अष्ट्रेलियाले ४६९ योगफल बनाउन सफल रहदा भारत पहिलो इनिङमा २९६ रनमा अलआउट भयो । पहिलो इनिङमा १६९ रन बनाएको ट्राभिस हेड म्यान अफ दि फाइनल बनेका छन् ।
भारत लगातार दोस्रोपटक टेस्ट च्याम्पियनसीपको फाइनलमा पराजित भएको हो । पहिलो संस्करणमा भारतलाई हराउँदै न्यूजिल्यान्ड विजेता भएको थियो ।
