काठमाडौं । नेपाली कांग्रेसका सांसद विमलेन्द्र निधिले सदनमा नेकपा एमालेका अध्यक्ष केपी शर्मा ओलीको लामो टिप्पणीमा व्यंग्य गरेका छन् । निधिले मंगलबार प्रतिनिधिसभामा बजेटमाथि टिप्पणी गर्ने क्रममा प्रमुख प्रतिपक्षी दलका अध्यक्ष ओलीले घडि हेरेरै १ घण्टा ५८ मिनेट बोलेको बताए ।
अर्थमन्त्रीले बजेट प्रस्तुत गर्न जति टाइम लिनुभयो, उहाँले त्यति नै टाइम लिनुभयो भन्दै निधिले भने, ‘प्रतिपक्षी दलका नेताले राम्रो होमवर्क गर्नुभएको रहेछ ।होमवर्क राम्रो गरेर आउनुभएकोमा धन्यवाद दिन चाहन्छु’ ।
निधिले ओलीको भाषणका क्रममा एमालेकै सांसदहरु निदाएको टिप्पणी गरे । उनले भने , ‘धेरैबेर पर्खेँ मैले पनि । प्रतिपक्षीको बेन्चतिर हेर्न थालेँ, जति समय बित्दै गयो, उहाँहरु निदाउन थाल्नुभयो । ताली बजाउन समेत बिर्सनुभएको थियो’।
ओलीसँग विद्यार्थी कालदेखि नै आफ्नो सम्बन्ध रहेको र केन्द्रीय कारागारमा सँगै बस्ने मौका पाएपनि त्यतिबेला र अहिलेको ओलीमा धेरै फरकपन देखिएको निधिले बताए । ओलीमा संसदीय व्यवस्थाप्रति प्रतिवद्धता देखिएको टिप्पणी गर्दै भने, ‘संसदीय प्रणालीप्रति साँच्चै प्रतिवद्ध हुन थाल्नुभयो । प्रतिपक्षीको भूमिकामा प्रतिवद्ध हुनुहुन्छ’।
