काठमाडौं । नेकपा एमालेका प्रमुख सचेतक पदम गिरीले करका दर हेरफेरको विषयमा अर्थमन्त्रीले चित्तबुझ्दो जवाफ नदिएमा एमाले चुपचाप नबस्ने बताएका छन् ।
मंगलबार प्रतिनिधिसभाको बैठकमा बोल्दै सचेतक गिरीले करका दरको विषयमा अर्थमन्त्रीको चित्तबुझ्दो जवाफ माग गरेका हुन् ।
‘हामी सुशासनको पक्षमा छौं । यसको विषयमा अर्थमन्त्रीले चित्तबुझ्दो जवाफ दिनुपर्यो । होइन भने संसदीय छानबिन समिति बनाएर छानबिन गराएर अगाडि बढ्नुपर्छ भन्ने पक्षमा छौं,’ उनले भने ।
सचेतक गिरीले बजेट निर्माण हुनुअघि मध्यवर्गीहरूले चढ्ने ११ सय गाडी नेपाल भित्रिनुमा शंकास्पद रहेको बताउदै भने, ‘महंगा गाडीमा भन्सारशुल्क खासै बढाइँदैन । तर, मध्यमवर्गीयहरूले चढ्ने गाडीमा भन्सार शुल्क बढाइन्छ । ती सबै कुरा कसरी भइरहेका छन् । आम जनताले जान्न चाहेका छन् । आज १५ प्रतिशत अन्तशुक्ल र भन्सार शुल्क बढेका साना गाडीहरू छन् । ती साना गाडीहरुमा ११ सय गाडी भित्रँदा राज्यलाई ९३ करोड नोक्सान हुन पुगेको छ ।’
