काठमाडौँ । आज प्रतिनिधिसभा र राष्ट्रियसभाको बैठक बस्ने भएको छ ।
प्रतिनिधिसभाको बैठक विहान ११ बजे बस्नेछ । प्रतिनिधिसभामा सोमबारदेखि सुरु भएको राजस्व र व्ययको वार्षिक अनुमानमाथि सैद्धान्तिक छलफल आज पनि जारी रहनेछ ।
अर्थमन्त्री डा प्रकाशशरण महतले यही जेठ १५ मा संघीय संसदको दुवै सदनको संयुक्त बैठकमा आगामी आर्थिक वर्षको वार्षिक राजस्व र व्ययको अनुमान प्रस्तुत गर्नुभएको थियो । सोमबार बसेको बैठकमा राजस्व र व्ययको वार्षिक अनुमानमाथिको सामान्य छलफलमा ज्ञानेन्द्रबहादुर कार्की, ठाकुर गैरे, देवेन्द्र पौडेल, डोलप्रसाद अर्याल, ज्ञानेन्द्र शाही, प्रदीप यादव, राजेन्द्रप्रसाद पाण्डेले धारणा राख्नुभएको थियो । आज बाँकी सांसदहरुले छलफलमा भाग लिनुहुनेछ ।
बजेटमाथिको सामान्य छलफलपछि विस्तृत मन्त्रालयगत छलफल भने पछि हुनेछ ।
राष्ट्रियसभाको आजको बैठकमा भने प्रधानमन्त्री पुष्पकमल दाहाल प्रचण्डले समसामयिक विषयमा मन्तव्य राख्नुहुने सम्भावित कार्यसूची छ । विहान ११ः११ बजे सुरु हुने भनिएको बैठकमा सुरुमा प्रधानमन्त्री दाहालले आफ्ना भनाइ राख्ने र त्यसपछि राष्ट्रपति कार्यालयबाट प्राप्त पत्र राष्ट्रियसभा अध्यक्षले पढेर सुनाउनुहुने कार्यक्रम छ ।
त्यसपछि अर्थमन्त्री डा. प्रकाशशरण महतले आगामी आर्थिकको राजस्व र व्ययको वार्षिक अनुमानमाथि सामान्य छलफल गरियोस् भन्ने प्रस्ताव प्रस्तुत गर्नुहुने कार्यक्रम छ । अर्थमन्त्रीले उक्त प्रस्ताव पेस गरेपछि उक्त प्रस्तावमाथि सामानय छलफल सुरु हुने सम्भावित कार्यसूची छ ।
