काठमाडौं । प्रधानमन्त्री केपि ओलीले जनता समाजवादी पार्टी (जसपा)को एउटा पक्षलाई सरकारमा सहभागी गराएको दुई दिनमै पुनः मन्त्रिपरिषद् विस्तारको तयारी गरेका छन् । प्रधानमन्त्री ओलीले आफूसँग रहेका ८ मन्त्रालयमध्ये ७ वटामा मन्त्री नियुक्तिको तयारी गरेका हुन् ।
पूर्व माओवादी खेमाका नेताहरूले सम्हालेका र शुक्रवार बिदाइ भएका एमाले मन्त्रीहरूले सम्हालेका मन्त्रालय अहिले ओलीले राखेका छन् ।
गृह, सूचना तथा सञ्चार प्रविधि, उद्योग वाणिज्य तथा आपूर्ति, कृषि तथा पशुपक्षी विकास, वन तथा वातावरण, संघीय मामिला तथा सामान्य प्रशासन मन्त्रालय ओलीसँगै छन् ।
मन्त्रीका आकांक्षीको सूची लामो भएपनि पूर्वमन्त्री गोकुल बाँस्कोटा, महेश बस्नेत, खगराज अधिकारी, कर्ण थापा, नारदमुनी रानाको चर्चा रहेको एमाले स्रोतले बतायो । गृह र सञ्चार मन्त्रालयमा धेरै नेताको दाबी रहेको स्रोतले बतायो ।
यस्तै विद्या भट्टराई, शान्ता चौधरी, राधा ज्ञवालीलगायत महिला नेतृहरू पनि मन्त्रीका लागि आकांक्षी देखिएका छन् ।
प्रधानमन्त्री ओलीले शुक्रवार जसपाका ८ मन्त्रीसहित एमालेका दुई मन्त्री थपेर मन्त्रिपरिषद् विस्तार गरेका थिए ।
सर्वोच्च अदालतमा मुद्दा विचाराधीन रहेका बाहेक पूर्वमाओवादीबाट एमालेमा आएका रामबहादुर थापा, टोपबहादुर रायमाझी समूहबाट पनि मन्त्रीमा समेटिन सक्ने स्रोतले बतायो ।