काठमाडौं । प्रधानमन्त्री पुष्पकमल दाहाल प्रचण्डले केपी शर्मा ओली नेतृत्वको सरकारले ९ जेठ २०७८ मा ल्याएको आध्यादेश र संसद्ले पास गरेको विधेयक समान रहेको बताउनुभएको छ ।
नागरिकता विधेयक प्रमाणीकरण गरेको विषयमा संसदमा उठेको प्रश्नहरुको जवाफ दिँदै उहाँले भन्नुभयो, “त्यो अध्यादेश र अहिले संसद्ले पास गरेको विधेयक जस्ताको तस्तै । जे अघिल्लो छ, त्यही पछिल्लो छ । अनावश्यक ढंगले विवादित बनाउँदा जनताले के बुझ्ने ? हामीले के बुझ्ने ?”
प्रधानमन्त्री प्रचण्डले वैवाहिक अंगीकृत नागरिकताका लागि कति वर्षको समयसीमा राख्ने भनेर सहमति खोज्नुपर्ने बताउनुभयो ।
जन्मसिद्ध नागरिकता प्राप्त नागरिकका सन्तानलाई वंशजको नागरिकता लिन मात्र यो विधेयक आएको उहाँले स्पष्ट गर्नुभयो ।
