काठमाडौँ । प्रधानमन्त्री पुष्पकमल दाहाल प्रचण्डले भारत भ्रमणका क्रममा नेपाल र भारतबीचको सीमा समस्याका लागि आफूले बंगलादेश मोडल प्रस्ताव नगरेको बताउनुभएको छ ।
भारत भ्रमणबारे सोमबार संसद्लाई जानकारी दिँदै उहाँले जमिन साटासाट गरेर सीमा समस्या समाधान गर्ने बंगलादेश मोडल आफ्नो प्रस्ताव नभएको स्पष्ट गर्नुभयो । “नेपालका केही विज्ञ, वुद्धिजीवीहरुले यस्ता पनि भनेका छन् मात्र भनेको छु”, उहाँले भन्नुभयो, “बंगलादेश मोडल मेरो कुरा होइन ।”
कालापानी, लिपुलेक र लिम्पियाधुराबारे आफूले प्रष्ट धारणा राखेको बताउनुभयो । उहाँले कालापानी, लिपुलेक र लिम्पियाधुरा नेपालको भूमि हो भन्ने स्थापित गर्न आफूले भूमिका खेलेको जानकारी दिनुभयो ।
भारतीय प्रधानमन्त्री नरेन्द्र मोदीले पनि सार्वजनिक रुपमै सीमा समाधान गर्छौं भनेर पहिलो पटक बोलेको भन्दै उहाँले यताउता गर्यो कि भनेर राखेका देख्दा चिन्तित र पीडित भएको बताउनुभयो ।
बरु एमाले निकट वुद्धिजिवीहरुले नै बंगलादेशसँग पहुँच हुने हो भने विकल्पमा जान सकिन्छ भनेको उहाँको भनाइ थियो । प्रधानमन्त्री प्रचण्डले भन्नुभयो, “तपाईंहरुसँग नजिक भएका वुद्धिजीवीहरुले भनेका छन् । नाम भन्नै बल गर्नुहुन्छ भने मलाई अप्ठ्यारो छैन ।”
