एजेन्सी । दक्षिण अमेरिकी देश गुयानामा एक युवतीले आफ्नै विद्यालयको होस्टेलमा आगो लगाएकी छन् । आगलागीमा १९ जनाको मृत्यु भएको छ । मृत्यु हुनेमा होस्टेल वार्डनका पाँच वर्षीय छोरा पनि छन् ।
सुरुमा आगलागीको कारण खुल्न सकेको थिएन । तर अनुसन्धान अघि बढ्दै जाँदा होस्टेलमा बसेकी १४ वर्षीया बालिकाको नाम सार्वजनिक भएको छ । वास्तवमा बालिकाको फोन होस्टेल वार्डनले जफत गरेका थिए । यसबाट आक्रोशित युवतीले वार्डन र होस्टेल प्रशासनलाई पाठ सिकाउन चाहेकी थिइन् । जसका कारण उनले रातिको अँध्यारोमा होस्टेलमा आगो लगाइन् ।
स्थानीय सञ्चारमाध्यमका अनुसार १४ वर्षीया युवती होस्टेलमा बारम्बार मोबाइल फोन प्रयोग गर्थिन् । तर छात्रावास र विद्यालयमा त्यसो गर्न निषेध गरिएको थियो । जसका कारण होस्टेल वार्डनले उनको फोन जफत गरे । फोन जफत भएपछि युवती रिसाएकी थिइन् र बदला लिने उपाय खोज्दै थिइन् ।
मध्यरातमा जब सबै केटीहरू र वार्डन सुतिरहेका थिए, अभियुक्त युवतीले छात्रावास भित्रैबाट आगो लगाएकी थिइन् । यसक्रममा सबै पाँचवटा निकास ढोकाहरू बन्द गरिएको थियो ।
राति अबेरसम्म भएको आगलागी र ढोका बन्द भएका कारण छात्रावासमा रहेका छात्राहरू समयमै बाहिर निस्कन सकेनन् । त्यहाँ १३ बालिकाको जलेर निधन भयो । बाँकी ६ बालिका र एक बालकको अस्पतालमा उपचारका क्रममा मृत्यु भएको हो ।
उक्त दुर्घटनामा आरोपी युवती आफै पनि घाइते भएकी छिन् । घटनाको समयमा उनी पनि होस्टेलभित्रै थिइन् । आगो यति धेरै फैलिन सक्छ भन्ने उनलाई थाहा नभएको बताइएको छ ।
