एजेन्सी । हलिउडका दिग्गज अभिनेता अल पचिनोको बारेमा एउटा ठूलो खबर बाहिर आएको छ, जसले सामाजिक सञ्जालमा हलचल मच्चाएको छ ।
अल पचिनो ८३ वर्षको उमेरमा पिता बन्न लागेका छन् । अभिनेताकी २९ वर्षीया प्रेमिका नूर अलफल्लाह गर्भवती छिन् । नूर आठ महिनाको गर्भवती छिन्, र उनको डेलिभरी पनि चाँडै नै हुने बताइएको छ ।
अल पचिनो र नूर अल्फाल्लाहको बारेमा कुरा गर्दा, दुबै अप्रिल २०२२ देखि सँगै छन् । यो जोडी पहिलो पटक डिनर डेटमा देखिएका थिए, त्यसपछि उनीहरुको सम्बन्धको खबरले निकै चर्चा पायो ।
अहिले मिडिया रिपोर्टका अनुसार नूर आठ महिनाको गर्भवती छिन् र डेलिभरी जुनको अन्त्यमा वा जुलाईको शुरुमा हुने भएको छ । यसरी अल पचिनो चौथो पटक बाबु बन्ने भएका छन् ।
पचिनोकी पूर्व प्रेमिका एक्टिङ कोच जान टारान्टसँग उनको ३३ वर्षिया छोरी (जुली) छन्। यस्तै पूर्व प्रेमिका बेभर्ली डीएन्जेलोसँग २२ वर्षीय जुम्ल्याहा एन्टोन र ओलिभिया सन्तान छन् । पचिनोले २००८–१८ सम्म लुसिला पोलकलाई पनि डेट गरे तर उनको कुनै सन्तान छैन ।
अल पचिनो आफ्नो समयका चर्चित स्टारमध्ये एक हुन् । उनी ‘इन्सोम्निया’, ‘द आयरिशम्यान’, ‘द गडफादर’, ‘स्कारफेस’, ‘हीट’, ‘द डेभिल्स एड्भोकेट’ र ‘सेन्ट अफ ए वुमन’ जस्ता चर्चित फिल्ममा आफ्नो अभिनयका लागि परिचित छन् । धेरै कम मानिसहरूलाई थाहा छ कि पचिनोले आफ्नो क्यारियर स्ट्यान्ड–अप–कमेडियनको रूपमा सुरु गरेका हुन् ।
