काठमाडौँ । काठमाडौँ महानगरपालिकाका मेयर बालेन शाहले विपन्न एवम् लक्षित वर्गले पाउनुपर्ने निःशुल्क उपचार नगराउने ६८ स्वास्थ्य संस्थालाई कारबाहीका लागि सिफारिस गरिएको जानकारी दिनुभएको छ । मेयर शाहले स्वास्थ्यसम्बन्धी छुट सुविधा सर्वसाधरणलाई उपलब्ध नगराउने ६८ स्वास्थ्य संस्थालाई कारबाही गर्नका लागि स्वास्थ्य तथा जनसंख्या मन्त्री मोहन बस्नेतको ध्यानाकर्षण गराएको सामाजिक सञ्जालमार्फत् जानकारी दिनुभएको हो ।
मेयर शाहले सात दिनभित्र ती स्वास्थ्य संस्थालाई कारबाही नभए अस्पताल प्रशासन बन्द गराउन आफू बाध्य हुने बताउनुभएको छ ।
‘काठमाडौँ महानगरपालिका क्षेत्रभित्र रहेका अस्पताललगायत विभिन्न स्वास्थ्य संस्थाहरुले स्वास्थ्य संस्था सञ्चालन मापदण्ड, २०७७ एवं प्रचलित स्वास्थ्य सम्बन्धी कानुन अनुसार विपन्न एवं लक्षित वर्गहरुलाई दिनुपर्ने कुल शैयाको १० प्रतिशत छुट्याई निशुल्क उपचार गर्नुपर्ने लगायतका स्वास्थ्य सुविधाहरु उपलब्ध गराउने सम्बन्धमा यस काठमाडौँ महानगरपालिकाबाट मिति २०८०।०२।०६ गते सार्वजनिक सूचना जारी भैसकेको छ । नेपालको संविधान र प्रचलित कानुनले आधारभूत स्वास्थ्य सम्बन्धी मौलिक हक राज्यले प्रत्याभूति गर्नुपर्ने र सो अधिकारको कार्यान्वयन गर्ने दायित्व तीनै तहको सरकारको रहेको छ । स्वास्थ्यमा सर्वसाधारणको पहुँच अभिवृद्घि गर्दै सबैका लागि सर्वसुलभ स्वास्थ्य उपलब्ध गराउने र विद्यमान कानुन अनुसार नागरिकले पाउने स्वास्थ्य सम्बन्धी छुट सुविधाहरु उपलब्ध गराउने तर्फ माननीय मन्त्रीज्यूको ध्यानाकर्षण गराउँदै काठमाडौँ महानगरपालिकाले छुट सुविधा सम्बन्धी विवरण माग गर्दा उपलब्ध नगराउने ६८ स्वास्थ्य संस्थाहरुको संलग्न विवरण अनुसार नियमन र कारबाही गर्न अनुरोध गरेको छौ । यदि मन्त्री ज्युले ७ दिन भित्र उहाँहरुलाई कानुनी दायरामा ल्याउनु भएन भने हामी अस्पताल प्रशासन बन्द गर्न बाध्य हुनेछौ’, मेयर शाहले भन्नुभएकाे छ ।
