काठमाडौँ । प्रधानमन्त्री पुष्पकमल दाहाल प्रचण्डले भारत भ्रमणका क्रममा सकेसम्म राम्रो गर्न कोसिस गर्ने बताउनुभएको छ । उहाँले भ्रमणका क्रममा सकेसम्म राम्रो गर्ने नभए नराम्रो चाहिँ नगर्ने बताउनुभयो ।
माओवादी सल्लाहकार समिति र जेष्ठ कम्युनिस्ट मञ्चको संयुक्त बैठकमा मंगलबार उहाँले जनताले सम्झिने केही काम होस् भन्ने चाहनाका साथ भोलि भारत जान लागेको उल्लेख गर्नुभयो ।
ठूलो बजारको सुनिश्चितता नहुँदा नेपालको विद्युतमा ठूलो लगानी आउन नसकेको भन्दै उहाँँले बजार सुनिश्चित गर्ने सम्भावना रहेको बताउनुभयो । प्रधानमन्त्री प्रचण्डले बंगलादेशसम्म नेपालको विद्युत व्यापारको बाटो खोल्न सके भविश्यसम्म सम्झने काम हुने बताउनुभयो । “पञ्चेश्वर २६ वर्षदेखि रोकिएर बसेको छ । त्यसलाई मात्र ठिक ढंगले खुलाउन सक्ने हो भने राम्रो गर्छ”, उहाँको भनाइ थियो ।
प्रधानमन्त्री प्रचण्डका अनुसार ट्रेड एण्ड ट्रान्जिट सन्धिलाई टुंगोमा पुर्याउने, सीमा विवादको समाधान खोज्ने लगायतका एजेण्डा आफ्नो भारत भ्रमणमा रहेको जानकारी दिनुभयो । “मैले लिएको संकल्प यत्ति हो भोलि राम्रो गर्न सकिए ठीक छ, सकिएन भने नराम्रो गरेर चाहिँ नआउने”, उहाँले भन्नुभयो ।
