काठमाडौँ । अर्थमन्त्री डा प्रकाशशरण महतले सांसदहरुलाई दिइएको ५ करोड रकम सांसद विकास कोष नभई संसदीय क्षेत्र पूर्वाधार विकास कार्यक्रम भएको स्पष्ट गर्नुभएको छ ।
मंगलबार अर्थ मन्त्रालयमा पत्रकार सम्मेलन गर्दै अर्थमन्त्री महतले संसदीय क्षेत्र पूर्वाधार विकास कार्यक्रमले स्थानीय आवश्यकतको सम्बोधन गर्ने बताउनुभयो ।
“यो सांसद विकास कोष होइन, संसदीय क्षेत्र पूर्वाधार विकास कार्यक्रम हो”, उहाँले भन्नुभयो, “सांसदहरूलाई कुनै आयोजना सिफारिस नै गर्न नपाउने भन्नु भएन । त्यहाँका आवश्यकता त्यहीँका जनप्रतिनिधिलाई थाहा हुने हुनाले सिफारिस गर्न पाउने भनिएको हो ।”
पाँच करोड रुपैयाँ संघीय मन्त्रालयअन्तर्गतकै विभागहरुले ठेक्का लगाएर काम हुने भन्दै उहाँले यो कार्यक्रमको बजेट दुरुपयोग नहुने बताउनुभयो । एक करोड माथिका मात्रै आयोजनामा पैसा खर्च गर्नुपर्ने भएकाले त्यो उपभोक्ता समितिमार्फत गर्न नमिल्ने उहाँको भनाइ थियो ।
“यो तल जाने होइन, मन्त्रालयअन्तर्गतका विभागले ठेक्का लगाउने हो । सांसद्ले त सिफारिस मात्रै गर्ने हो,’ मन्त्री महतले भन्नुभयो, “अब उनीहरु आफैँले वा उपभोक्ता समितिमार्फत काम गर्न पाउँदैन ।”
