काठमाडौं । अर्थमन्त्री डा. प्रकाशशरण महतले बजेट कार्यान्वयनमा शङ्का नगर्न आग्रह गर्नुभएको छ ।
मंगलबार अर्थ मन्त्रालयमा आयोजित पोस्ट बजेट पत्रकार सम्मेलनमा उहाँले बजेटमा लक्ष्य पूरा गर्न सकिने गरि तोकिएको दावी गर्नुभयो । यसलाई कामले प्रमाणित गरिने उहाँको भनाइ थियो ।
यसपटक बजेट कार्यान्वयनका समस्या पहिचान गरी बजेट निर्माण गरिएको भन्दै अर्थमन्त्री महतले बजेट प्रणालीमा सुधार, कार्यान्वयन सुधारमा बुँदागत रुपमै प्रयास गरिएको उल्लेख गर्नुभयो ।
१७ खर्बको बजेटमा पूँजीगत प्रकृतिको बजेट ४ खर्ब ७१ अर्ब हाराहारी रहेको भन्दै पूँजीगत खर्च नघटाइएको उहाँको प्रष्टोक्ति थियो ।
