काठमाडौँ । संसदीय सुनुवाइ समिति गठन भएको छ । प्रतिनिधिसभाको आइतबारको बैठकमा सभामुख देवराज घिमिरेले सुनुवाइ समितिमा रहने सदस्यहको नाम प्रस्तुत गर्नुभएको थियो ।
बैठकले स्वीकृत गरेको समितिमा नेपाली कांग्रेस र नेकपा (एमाले)का तर्फबाट ४/४ जना छन् ।
कांग्रेसका तर्फबाट रमेश लेखक, ईश्वरीदेवी न्यौपाने, जीवन परियार र ज्ञानेन्द्रबहादुर कार्की सदस्य हुनुहुन्छ भने एमालेबाट पदम गिरी, महेशकुमार बर्तौला, लिलानाथ श्रेष्ठ र ईश्वरी जीएम सदस्य रहनुभएको छ ।
संसदीय सुनुवाइ समितिमा नेकपा (माओवादी केन्द्र)बाट जनार्दन शर्मा सदस्य रहनुभएको छ । त्यसैगरी राष्ट्रिय स्वतन्त्र पार्टी (रास्वपा)बाट डोलप्रसाद अर्याल, राष्ट्रिय प्रजातन्त्र पार्टी (राप्रपा)बाट पशुपति शम्शेर जबरा र जनता समाजवादी पार्टी (जसपा)का तर्फबाट प्रकाश अधिकारी उक्त समितिको सदस्य रहनुभएको छ ।
१५ सदस्यीय समितिमा राष्ट्रियसभाबाट नेपाली कांग्रेसका रमेशजङ्ग रायमाझी, नेकपा (एमाले) का देवेन्द्र दाहाल र माओवादी केन्द्रका जगप्रसाद शर्मा वैशाख १३ गते नै मनोनीत भइसक्नुभएको छ ।
